ഫുട്ബോള്‍ പ്രേമികളുടെ സ്വപ്ന പരിശീലന കേന്ദ്രമായ റിലയല്‍സ് ഫൗണ്ടേഷന്‍ ടീമില്‍ അംഗമായ വയനാട് മീനങ്ങാടി ചീരാംകുന്ന് സ്വദേശി അലന്‍ സജി വയനാടന്‍ ഫുട്ബോള്‍ ആരാധകര്‍ക്ക് ആവേശമാവുന്നു. മീനങ്ങാടി പഞ്ചായത്ത് ഫുട്ബോള്‍ അക്കാദമിയിലൂടെ പരിശീലനം തുടങ്ങിയ അലന്‍ മീനങ്ങാടി യങ് ചാമ്പിന്റെ താരമായിരുന്നു. ചീരാംകുന്നിലെ കര്‍ഷക ദമ്പതികളായ സജിയുടെയും സന്ധ്യയുടെയും രണ്ട് മക്കളില്‍ ഇളയവനാണ് അലന്‍. കോതമംഗലം എന്‍.എ കോളേജ് വിദ്യാര്‍ത്ഥിയായ ജേഷ്ഠന്‍ അലക്സ് കേരളാ ബ്ലാസ്റ്റേഴ്സ് ജൂനിയര്‍ ടീം അംഗമാണ്. കോഴിക്കോടും ബംഗളൂരുവിലും വച്ച് നടന്ന സെലക്ഷന്‍ ക്യാമ്പിലൂടെയാണ് അലന്‍ മൂന്ന് മാസം മുമ്പ് റിലയന്‍സ് ഫൗണ്ടേഷന്റെ അണ്ടര്‍ 12 ടീമില്‍ അംഗമായത്. ലോകത്തെ മുന്‍നിര ഫുട്ബോള്‍ ടീമുകളുമായി മത്സര പരിശീലനമാണ് ഇതിലെ കളിക്കാരുടെ പ്രധാന സാധ്യത. ആള്‍ ഇന്ത്യ ഫുട്ബോള്‍ ഫെഡറേഷന്റെ സി ലൈസന്‍സ്് കോച്ചായ ബിനോയ് ആയിരുന്നു അലന്റെ പരിശീലകന്‍.
