രണ്ട് കുരുന്നുകളുടെ ജീവന്‍ രക്ഷപ്പെടുത്തിയ ഒമ്പതാം ക്ലാസ്സുകാരന് കൈനിറയെ സമ്മാനവും മനസ് നിറയെ സ്നേഹവും നല്‍കി തരുവണ പൗരാവലിയുടെ സ്വീകരണം.കല്ലോടി ഹൈസ്‌കൂള്‍ 9-ാം ക്ലാസ് വിദ്യാര്‍ത്ഥി എടവക പാതിരിച്ചാല്‍ എരണക്കൊല്ലി ജയകൃഷ്ണനുവേണ്ടിയാണ് വേറിട്ട രീതിയിലുള്ള സ്വീകരണം ഒരുക്കിയത്.കഴിഞ്ഞ ദിവസം കരിങ്കല്‍ കോറിയില്‍ അപകടത്തില്‍ പെട്ട തരുവണ സ്വദേശികളായ രണ്ട് കുട്ടികളെയാണ് ജയകൃഷ്ണന് രക്ഷപ്പെടുത്തിയത്.
അമ്പതോളം സമ്മാനപ്പൊതികള്‍,സ്വര്‍ണ്ണപ്പതക്കം,സൈക്കിള്‍,കമ്പ്യൂട്ടര്‍ ടേബിള്‍,നിരവധിപേരുടെ കേഷ്പ്രൈസ്,വിവിധ സംഘടനകളുടെ മൊമെന്റോകള്‍, തുടങ്ങി കൈനിറയെ സമ്മാനങ്ങളോരുക്കിയാണ് തരുവണ പൗരാവലി ജയകൃഷ്ണന് സ്വീകരണമൊരുക്കിയത്.സ്വീകരണ സ്ഥലത്ത് നിന്നും മുപ്പതോളം വാഹനങ്ങളുടെ അകമ്പടിയോടെയാണ് ജയകൃഷ്ണനെയും കുടുംബത്തെയും തിരികെ വീട്ടിലെത്തിച്ചത്.കഴിഞ്ഞ മാസം 29 ന് പാതിരിച്ചാല്‍ കരിങ്കല്‍ കോറിയിലകപ്പെട്ട തരുവണ സ്വദേശികളായ കാട്ടുമഠത്തില്‍ അമീന്‍,സഫ്വാന്‍ എന്നീ കുട്ടികളെയായിരുന്നു ജയകൃഷ്ണന് വെള്ളത്തിലിറങ്ങി രക്ഷപ്പെടുത്തിയത്.അപകടത്തില്‍ ഷാമില്‍ എന്ന എട്ടാം ക്ലാസ് വിദ്യാര്‍ത്ഥി മരണപ്പെടുകയും ചെയ്തിരുന്നു.തരുവണയിലെ മുഴുവന്‍ രാഷ്ട്രീയ സാമൂഹ്യസംഘടനകളുടെയും പ്രവാസി സംഘടനകളുടയും സ്‌കൂള്‍ പിടിഎ കളുടെയും നേതൃത്വത്തിലായിരുന്നു ജയകൃഷ്ണന് സ്വീകരണമൊരുക്കിയത്.സ്വീകരണ പരിപാടി എം എല്‍ എ ഒ ആര്‍ കേളു ഉദ്ഘാടനം ചെയ്തു.(ബൈറ്റ്)ചടങ്ങില്‍ ജില്ലാ പഞ്ചായത് പ്രസിഡന്റ് കെ ബി നസീമ,പഞ്ചായത് പ്രസഡന്റ് മാരായ പി തങ്കമണി,ഉഷാവിജയന്‍,വാര്‍ഡംഗങ്ങളായ കാഞ്ഞായി ഇബ്രാഹിംഹാജി,എ ജോണി,മനുകുഴിവേലി തുടങ്ങിയവര്‍ പങ്കെടുത്തു.ജയകൃഷ്ണന് സമ്മാനങ്ങള്‍ വിവിധ സംഘടനാ ഭാരവാഹികള്‍ കൈമാറി.പിസി ഇബ്രാഹിംഹാജി,കെസികെ നജ്മുദ്ദീന്‍ എന്നിവരാണ് പരിപാടികള്‍ക്ക് നേതൃത്വം നല്‍കിയത്.
