വൈത്തിരി സുഗന്ധഗിരിയില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച റിസോര്‍ട്ടുടമയും കൂട്ടാളിയും പിടിയില്‍. കര്‍ണാടക സ്വദേശിയായ 17 വയസുള്ള പെണ്‍കുട്ടിയെ റിസോട്ടില്‍ പൂട്ടിയിട്ട് നിരവധി പേര്‍ പീഡിപ്പിച്ചുവെന്നാണ് സൂചന. പെരിന്തല്‍മണ്ണ സ്വദേശി സുനിലും, സഹായി മായനാട് സ്വദേശി രഞ്ചിത്തുമാണ് പിടിയിലായത്. പെണ്‍കുട്ടിയുടെ മൊഴിയുടെ അടിസ്ഥാനത്തില്‍ വൈത്തിരി പോലീസ് അന്വേഷണം ഊര്‍ജ്ജിതമാക്കി. സുഗന്ധഗിരിയില്‍ ഗ്രീന്‍ ഹോപ്പര്‍ റിസോട്ട് കേന്ദ്രീകരിച്ച് പെണ്‍വാണിഭം നടക്കുന്നുവെന്ന രഹസ്യവിവരത്തെ തുടര്‍ന്ന് പോലീസ് നടത്തിയ പരിശോധനയിലാണ് പ്രതികള്‍ പിടിയിലാവുന്നത്. കര്‍ണാടക സ്വദേശിയായ 17 വയസുകാരിയെ ജോലി നല്‍കാമെന്ന വാഗ്ദാനം നല്‍കി പ്രതികളായ പെരിന്തല്‍മണ്ണ സ്വദേശി സുനിലും, സഹായി മായനാട് സ്വദേശി രഞ്ചിത്തും ചേര്‍ന്ന് റിസോട്ടിലെത്തിക്കുകയായിരുന്നു. രണ്ടുമാസത്തിനിടെ 20ലധികം പേര്‍ പീഡിപ്പിച്ചുവെന്നാണ് പെണ്‍കുട്ടി പോലീസിന് നല്‍കിയ മൊഴി. ഇരുവര്‍ക്കെതിരെയും പോക്സോ നിയമപ്രകാരം കേസെടുത്തു. മറ്റുള്ളവര്‍ക്കായി പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്. അനാശ്വാസ്യ പ്രവര്‍ത്തനങ്ങള്‍ക്കായി ശ്രീവത്സന്‍ കര്‍ണാടകയില്‍ നിന്നും തമിഴ്നാട്ടില്‍ നിന്നും നിരവധി സ്ത്രീകളെ റിസോര്‍ട്ടിലെത്തിക്കാറുണ്ടന്നും പെണ്‍കുട്ടി മൊഴി നല്‍കിയിട്ടുണ്ട്. ഇതെകുറിച്ചും പോലീസ് അന്വേഷണം തുടങ്ങി. തെളിവെടുപ്പിനുശേഷം ഇരുവരെയും ഇന്ന് വൈകിട്ട് കല്‍പ്പറ്റ കോടതിയില്‍ ഹാജരാക്കും.
