കര്‍ണാടകയിലെ എച്ച്.ഡി കോട്ട വനമേഖലയില്‍ അഴുകിയ നിലയില്‍ കണ്ടെത്തിയ മൃതദേഹം തേക്കനാംക്കുന്നേല്‍ സജിയുടെ ബന്ധുക്കള്‍ക്ക് സംസ്‌കരിക്കാന്‍ വിട്ട് നല്‍കിയ സംഭവത്തില്‍ കര്‍ണാടക ഉന്നത പോലീസ് സംഘം അന്വേഷണമാരംഭിച്ചു. ഈ മാസം 5 ന് കര്‍ണാടക പോലീസ് സംഘം മൃതദേഹം സംസ്‌കരിച്ച സ്ഥലം സന്ദര്‍ശിക്കുമെന്നും ജില്ലാ കലക്ടര്‍ ഉള്‍പ്പടെയുള്ളവരുടെ അനുമതിയോടെ തുടര്‍ നടപടി സ്വീകരിക്കുമെന്നും എച്ച്.ഡി കോട്ട പോലീസ് പറഞ്ഞു. സജിയുടെ ബന്ധുക്കളുള്‍പ്പടെയുള്ളവര്‍ കണ്ടശേഷമാണ് മൃതദേഹം വിട്ട് നല്‍കിയതെന്നും അധികൃതര്‍ പറഞ്ഞു. ആളുമാറി സംസ്‌കരിച്ച മൃതദേഹം ആരുടേതാണെന്ന് തുടര്‍ പരിശോധന നടത്തിയാല്‍ മാത്രമേ കണ്ടെത്തുവാന്‍ കഴിയുകയുള്ളുവെന്നും പോലീസ് പറഞ്ഞു. കഴിഞ്ഞ ദിവസം പുല്‍പ്പള്ളി സ്റ്റേഷനില്‍ സജി ഹാജരായതിനെതുടര്‍ന്ന് പുല്‍പ്പള്ളി എസ്എച്ച്ഒ റെജി കെ.ജോസ് എച്ച് ഡി കോട്ട പോലിസിനെ വിവരം അറിയിക്കുകയായിരുന്നു.
