ബത്തേരി: വയനാട് ലോക്‌സഭ മണ്ഡലത്തിലെ യു.ഡി.എഫ് സ്ഥാനാര്‍ത്ഥിയെ ഇന്ന് തീരുമാനിക്കും. ദേശീയ നേതാക്കളും സിറ്റിംഗ് എം.എല്‍.എയുമടക്കം നാലുപേരാണ് അന്തിമ പട്ടികയിലുള്ളത്. സ്ഥാനാര്‍ത്ഥി പ്രഖ്യാപനം നാളെ നടക്കുമെന്നുമാണ് ലഭിക്കുന്ന സൂചന. ഇന്ന് ഡല്‍ഹിയില്‍ നടക്കുന്ന സ്‌ക്രീനിംഗ് കമ്മിറ്റിയിലാണ് സ്ഥാനാര്‍ത്ഥിയാരെന്ന് തീരുമാനിക്കുക. എ.ഐ.സി.സി. ജനറല്‍ സെക്രട്ടറി കെ.സി.വേണുഗോപാല്‍, എ.ഐ.സി.സി.അംഗം ഷാനിമോള്‍ ഉസ്മാന്‍, കോഴിക്കോട് ഡി.സി.സി. പ്രസിഡണ്ട് ടി.സിദ്ദീഖ്, വട്ടിയൂര്‍ക്കാവ് എം.എല്‍.എയും തിരഞ്ഞെടുപ്പ് പ്രചരണസമിതി ചെയര്‍മാനുമായ കെ.മുരളീധരന്‍ എന്നിവരാണ് അന്തിമ പട്ടികയില്‍ ഇടം പിടിച്ചിരിക്കുന്നത്. ഇതിനു പുറമെ മുന്‍ കെ.പി.സി.സി പ്രസിഡണ്ട് എം.എം.ഹസ്സന്‍, എ.ഐ.സി.സി അംഗം കെ.സി. റോസകുട്ടി ടീച്ചറുടെ പേരുകളും പറഞ്ഞു കേള്‍ക്കുന്നുണ്ട്. ഇന്നത്തെ സ്‌ക്രീനിംഗ് കമ്മിറ്റിക്കു ശേഷം കോണ്‍ഗ്രസ്സ് ഹൈക്കാമാന്റ് സ്ഥാനാര്‍ത്ഥി നിര്‍ണ്ണയവും നാളെ പ്രഖ്യാപനവും ഉണ്ടാവുമെന്നാണ് നേതാക്കളില്‍ നിന്നും ലഭിക്കുന്ന വിവരം.
