സംസ്ഥാനത്ത് വരും ദിവസങ്ങളിലും ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഇന്ന് 5 ജില്ലകളില് യെല്ലോ അലര്ട്ട് പ്രഖ്യാപിച്ചു. വയനാട്, കോഴിക്കോട്, മലപ്പുറം, കണ്ണൂര്, കാസര്ഗോഡ് ജില്ലകളിലാണ് ശക്തമായ മഴ മുന്നറിയിപ്പുള്ളത്. ജില്ലയിലെ മൂന്ന് സ്കൂളുകള്ക്ക് അവധി പ്രഖ്യാപിച്ചു. വെള്ളാര്മല വൊക്കേഷണല് ഹയര് സെക്കന്ഡറി സ്കൂള്, പുത്തുമല യുപി സ്കൂള്, മുണ്ടക്കൈ യുപി സ്കൂള് എന്നിവയ്ക്കാണ് ഇന്ന് അവധി നല്കിയത്.
മേപ്പാടി, മുണ്ടക്കൈ മേഖലയില് രാത്രി ഇടവിട്ട് കനത്ത മഴ പെയ്തിരുന്നു. മുണ്ടക്കൈയില് ജനവാസമില്ലാത്ത മേഖലയില് മണ്ണിടിച്ചിലും ഉണ്ടായി. പുത്തുമല കാശ്മീര് ദ്വീപിലെ ചില കുടുംബങ്ങളെ ക്യാമ്പുകളിലേക്ക് മാറ്റി. ഈ സാഹചര്യം കണക്കിലെടുത്താണ് ഈ മേഖലയിലെ സ്കൂളുകള്ക്ക് അവധി നല്കിയത്. മഴക്കൊപ്പം മണിക്കൂറില് 50 കിലോമീറ്റര് വരെ വേഗതയില് വീശിയേക്കാവുന്ന കാറ്റിനും സാധ്യതയുണ്ട്.
