കെഎസ്ആര്‍ടിസി തദ്ദേശ സ്വയംഭരണ സ്ഥാപനങ്ങളുമായ് കൈകോര്‍ത്ത് സര്‍വീസുകള്‍ നിലവില്‍ ഇല്ലാത്ത ബസ് റൂട്ടുകളില്‍, പ്രത്യേകിച്ച് ഗ്രാമപ്രദേശങ്ങളില്‍ പ്രവര്‍ത്തിപ്പിക്കാന്‍ ലക്ഷ്യമിടുന്ന ‘ഗ്രാമ വണ്ടി’ പദ്ധതിക്ക് ജില്ലയില്‍ തുടക്കം.
മാനന്തവാടി ബ്ലോക്ക് പഞ്ചായത്തിന്റെ സഹകരണത്തോടെ ആരംഭിക്കുന്ന ജില്ലയിലെ ആദ്യ സര്‍വ്വീസിന്റെ ഉദ്ഘാടനം ജനുവരി 6 ന് നടക്കും.മാനന്തവാടിയില്‍ ജനുവരി 6 ന് രാവിലെ 10.30 ന് നടക്കുന്ന ആദ്യ സര്‍വ്വീസിന്റെ ഉദ്ഘാടനം സംസ്ഥാന ഗതാഗത വകുപ്പ് മന്ത്രി അഡ്വ. ആന്റണി രാജു നിര്‍വ്വഹിക്കും.
ബ്ലോക്ക് പഞ്ചായത്ത്പരിധിയിലെ യാത്രാക്ലേശം രൂക്ഷമായ സ്ഥലങ്ങളിലേക്കായിരിക്കും ഗ്രാമവണ്ടി ആദ്യം ഓടുക. നിലവില്‍ വാഹന സൗകര്യം കുറവുള്ള റൂട്ടുകളായ നല്ലൂര്‍നാട് വയനാട് ജില്ലാ കാന്‍സര്‍ സെന്റര്‍,കാരക്കുനി യൂണിവേഴ്‌സിറ്റി ക്യാമ്പസും, ബി.എഡ് സെന്റര്‍ എന്നിവക്കായിരിക്കും ബ്ലോക്ക് പഞ്ചായത്ത് മുന്‍ഗണന നല്‍കുക. രാവിലെ മാനന്തവാടിയില്‍ നിന്നും ആരംഭിച്ച് വൈകുന്നേരം മാനന്തവാടിയില്‍ തന്നെ എത്തുന്ന രീതിയിലാണ് ഗ്രാമവണ്ടിയുടെ സര്‍വീസ് ക്രമീകരിച്ചിരിക്കുന്നത്. ദിവസേന നൂറ്റമ്പതോളം കിലോമീറ്റര്‍ ഗ്രാമവണ്ടി സഞ്ചരിക്കും. വരും വര്‍ഷങ്ങളില്‍ അതത് തദ്ദേശ സ്വയംഭരണ പ്രദേശങ്ങളില്‍ കൂടി ഗ്രാമവണ്ടി യാഥാര്‍ത്യമാക്കാനുള്ള ശ്രമത്തിലാണ് അധികൃതര്‍. ‘ഗ്രാമവണ്ടിക്കായി തയാറാക്കിയ ബസ് മാനന്തവാടി ഗ്യാരേജില്‍ അവസാന വട്ട മിനുക്കു പണിയിലാണ്.
