കാറിടിച്ച് പരിക്കേറ്റ് ചികിത്സയിലായിരുന്ന സുല്‍ത്താന്‍ ബത്തേരി കെഎസ്ആര്‍ടിസി ഡിപ്പോയിലെ കണ്ടക്ടര്‍ മരിച്ചു.കോട്ടയം മുരുക്കുംവയല്‍ കരുംനിലം കല്ലുക്കുന്നേല്‍ വീട്ടില്‍ കെ.ആര്‍ രഞ്ജിത്ത്(30) ആണ് മരിച്ചത്.ഇക്കഴിഞ്ഞ ശനിയാഴ്ച വൈകിട്ട് 7 മണിയോടെ സുല്‍ത്താന്‍ ബത്തേരി കെഎസ്ആര്‍ടിസി ഡിപ്പോയ്ക്ക് മുന്നില്‍ ബത്തേരി-പുല്‍പ്പളളി റോഡില്‍ വെച്ചാണ് രഞ്ജിത്തിനെ കാര്‍ ഇടിച്ച് തെറിപ്പിച്ചത്.ഡ്യൂട്ടി കഴിഞ്ഞ് ക്വാട്ടേഴ്‌സിലേക്ക് മടങ്ങുന്നതിനിടെ സാധനം വാങ്ങാന്‍ കടയിലേക്ക് പോകുമ്പോഴാണ് അപകടം സംഭവിച്ചത്.അപകടത്തില്‍ തലയ്ക്ക് സാരമായി പരുക്കേറ്റ രഞ്ജിത്തിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിക്കുകയായിരുന്നു.തുടര്‍ന്ന് ചികിത്സയിലിരിക്കേ ഇന്ന് പുലര്‍ച്ചെയാണ് മരണം സംഭവിച്ചത്.രഞ്ജിത്തിനെ ഇടിച്ചശേഷം നിര്‍ത്താതെ പോയ കാര്‍ ഇതുവരെ കണ്ടെത്താനായിട്ടില്ല.ഡിപ്പോ അധികൃതര്‍ പോലിസില്‍ പരാതി നല്‍കിയിട്ടുണ്ട്.പുല്‍പ്പള്ളി ഭാഗത്തേക്ക് പോകുകയായിരുന്ന വെള്ള സ്വിഫ്റ്റ് കാറാണ് രഞ്ജിത്തിനെ ഇടിച്ചതെന്നാണ് പറയുന്നത്.
