അപകടത്തില്‍ പരിക്കേറ്റ് കിടപ്പിലായ എസ്.മണികണ്ഠന്‍(36) ദുരിതങ്ങള്‍ക്കിടയില്‍ നിന്ന് മോചനം നേടാന്‍ സുമനസ്സുകളുടെ സഹായം വേണം.കുട്ടിരായിന്‍പാലത്തിനടുത്ത് ശ്രീപുരം വീട്ടില്‍ സെല്‍വരാജിന്റെ മകനാണ് മണികണ്ഠന്‍.ഒന്നര വര്‍ഷത്തിലേറെയായി ശയ്യാവലംബിയായി ജീവിതം തള്ളിനീക്കുകയാണ്.ഭാര്യയും നാലരയും,രണ്ടരയും വയസ്സുള്ള പിഞ്ചുകുഞ്ഞുങ്ങളും,അമ്മയും അടങ്ങുന്ന കുടുംബം.ഇതോടെ നിരാലംഭരായിരിക്കുകയാണ്.മണികണ്ഠന്റെ ചികിത്സയും കുടുംബത്തിന്റെ നിത്യ ചിലവും ഇപ്പോള്‍ നാട്ടുകാരുടെ സഹായത്തോടെയാണ് നടക്കുന്നത്.ഓട്ടോ ഡ്രൈവറായിരുന്ന മണികണ്ഠന്റെ ജീവിതം തകര്‍ത്തത് ഒന്നര വര്‍ഷം മുമ്പ് നടന്ന വാഹനാപകടത്തിലാണ്.അപകടത്തില്‍ നട്ടെല്ല് പൊട്ടി,ഞരമ്പുകള്‍ക്കും കേടുപറ്റി.ചികിത്സയ്ക്കും മറ്റുമായി ഇതിനോടകം രണ്ടര ലക്ഷം ചിലവായി.പ്രാഥമികാവശ്യങ്ങള്‍ക്ക് ട്യൂബ് ഇട്ടിരിക്കുകയാണ്.തുടര്‍ ചികിത്സ നടത്തിയാല്‍ എഴുന്നേറ്റ് നടക്കാമെന്നാണ് ഡോക്ടര്‍ പറഞ്ഞിട്ടുള്ളത്.ഞരമ്പ് പൊട്ടി കഴുത്താകെ തൂങ്ങി പോയി.കഴുത്ത് ശരിയായാല്‍ മാത്രമേ നട്ടെല്ല് ചികിത്സ നല്‍കാന്‍ പറ്റുകയുള്ളു.ഐ.സി.ബാലകൃഷ്ണന്‍ എം.എല്‍.എ ഒന്നരമാസം മുമ്പ് മണികണ്ഠനെ സന്ദര്‍ശിച്ചിരുന്നു.നാലുവയസ്സുള്ള മകള്‍ ഹര്‍ഷിനി,മീനങ്ങാടി ഗവ:സ്‌കൂളില്‍ യു.കെ.ജി-യിലാണ്.സ്‌കൂള്‍ അധികൃതര്‍ വണ്ടിക്കൂലിയും ഫീസും ഒഴിവാക്കി കൊടുത്തതിനാല്‍ കുഞ്ഞിന്റെ പഠനം മുടങ്ങുന്നില്ലെന്നാണ് കിടപ്പിലും മണികണ്ഠന്റെ ആശ്വാസം.കുട്ടിരായിന്‍ പാലത്തിനടുത്തെ പുറംപോക്കിലാണ് ഇവരുടെ താമസം.പുറംപോക്ക് സ്ഥലമായതിനാല്‍ ചെറിയ വീട് വിറ്റ് ചികിത്സയ്ക്ക് പണം കണ്ടെത്താനും സാധിക്കുന്നില്ല.മീനങ്ങാടിയിലെ മുസ്ലീം ക്രിസ്ത്യന്‍ പള്ളിക്കാര്‍ പിരിവെടുത്ത് ഇടക്കിടെ സഹായിക്കും.ജാതി ആനുകൂല്യത്തിന് അര്‍ഹതയില്ലാത്തതിനാല്‍ അത്തരത്തിലുള്ള സര്‍ക്കാര്‍ സഹായങ്ങളും ലഭിച്ചിട്ടില്ല.എഴുന്നേല്‍ക്കാനായാല്‍ എന്തെങ്കിലും ജോലി ചെയ്ത് കുടുംബം പോറ്റാമെന്ന പ്രതീക്ഷ ഈ യുവാവ് കൈവെടിയുന്നില്ല.അതിന് സുമനസ്സുകളുടെ കരുണ വേണം.ഇതിനായി ഒരു കമ്മിറ്റി രൂപീകരിച്ചു.ചെയര്‍മാന്‍ വി.സി.ബിജുവും കണ്‍വീനറും വാര്‍ഡ് മെമ്പറുമായ ആര്‍ രതീഷ്,ട്രഷറര്‍ വി.എ.അബ്ബാസ് തുടങ്ങി 51 അംഗ കമ്മിറ്റി രൂപീകരിച്ചു.മീനങ്ങാടി ഫെഡറല്‍ബാങ്ക് ശാഖയില്‍ എസ് ബി അക്കൗണ്ട് തുടങ്ങിയിട്ടുണ്ട്.അക്കൗണ്ട് നമ്പര്‍:17710100051510-ഐഎഫ്‌സി കോഡ് ഫെഡറല്‍ ബാങ്ക് 0001771-എം.ഐ.സി.ആര്‍ കോഡ്-673049253.
