ബത്തേരി: കോട്ടക്കുന്നില് വീട് കുത്തിതുറന്ന് 15 ലക്ഷം രൂപ കവര്ന്ന കേസില് രണ്ടാമനും പിടിയില്. മലപ്പുറം, വേരുപ്പാലം, വെള്ളോടുചോല വീട്ടില് അബ്ദുള് റഷീദ്(50)നെയാണ് ബുധനാഴ്ച രാവിലെ ബത്തേരി പോലീസ് അറസ്റ്റ് ചെയ്തത്. സംഭവ ശേഷം ഒളിവിലായിരുന്ന ഇയാളെ ഓമശ്ശേരിയില് നിന്ന് കൊടുവള്ളി പോലീസിന്റെ സഹായത്തോടെയാണ് കസ്റ്റഡിയിലെടുത്തത്. എല്ലാ സ്റ്റേഷനുകളിലേക്കും ക്രൈം കാര്ഡ് അയച്ചു കൊടുത്തും മൊബൈല് ഫോണ് കേന്ദ്രീകരിച്ചും നടത്തിയ പരിശോധനയിലാണ് റഷീദ് പിടിയിലായത്.. മലപ്പുറം സ്വദേശിയായ കൂരിമണ്ണില് പുളിക്കാമത്ത് അബ്ദുള് അസീസിന്റെ വീട് കുത്തിതുറന്ന് 15,03,000 രൂപ കവര്ന്ന കേസിലാണ് അറസ്റ്റ്. സംഭവത്തില് നിരവധി മോഷണ കേസുകളില് പ്രതിയായ കുപ്രസിദ്ധ മോഷ്ടാവായ മലപ്പുറം, നെച്ചിക്കുന്നത്ത് വീട്ടില് വേണുഗാനനെ(52) ജൂണ് 26 ന് പാലക്കാട് നിന്ന് പിടികൂടിയിരുന്നു. ജൂണ് 19-ന് രാവിലെ നാലിനും ആറിനുമിടയിലാണ് മോഷണം നടന്നത്.
