ഒക്ടോബര്‍ 1ന് അന്താരാഷ്ട്രാ കോഫി ദിനാചരണത്തോട് അനുബന്ധിച്ച് ബ്രഹ്മഗിരി വയനാട് കോഫി വിപണനം തുടങ്ങുമെന്ന് ഭാരവാഹികള്‍ കല്‍പ്പറ്റയില്‍ വാര്‍ത്താസമ്മേളനത്തില്‍ അറിയിച്ചു. വിപണന ഉദ്ഘാടനം മന്ത്രി ഡോ. തോമസ് ഐസക് നിര്‍വഹിക്കും. വയനാട്ടിലെ കാപ്പി കര്‍ഷകരുടെ വരുമാനം ഇരട്ടിയാക്കുന്നതിനായി ആരംഭിച്ച ആധുനിക സഹകരണ കൃഷി പദ്ധതിയാണ് ബ്രഹ്മഗിരി വയനാട് കോഫി. കര്‍ഷകരുടെ ഉത്പ്പന്നങ്ങള്‍ ഇടനിലക്കാരെ ഒഴിവാക്കി കര്‍ഷക കൂട്ടായ്മയില്‍ സംഭരിച്ച് – സംസ്‌കരിച്ച് – വിപണനം നടത്തുന്നു. അതിലൂടെ ലഭിക്കുന്ന മിച്ചം ബ്രഹ്മഗിരി ലാഭമെടുക്കാതെ കര്‍ഷകര്‍ക്കും തൊഴിലാളികള്‍ക്കും അധിക വിലയായി ലഭ്യമാക്കുകയും ചെയ്യുകയാണ് ലക്ഷ്യമെന്ന് ഭാരവാഹികള്‍ പറഞ്ഞു. വയനാട്ടിലെ മുഴുവന്‍ കാപ്പി തോട്ടങ്ങളും മൂന്ന് മുതല്‍ അഞ്ചു വര്‍ഷത്തിനുള്ളില്‍ സുസ്ഥിര കൃഷിയിടങ്ങളാകും. ഇന്ത്യന്‍ കോഫി ബോര്‍ഡിന്റെ പിന്തുണയോടുകൂടിയാണ് പദ്ധതി നടപ്പിലാക്കുന്നത്. കണിയാമ്പറ്റയില്‍ കോഫി പ്രൊഡക്ഷന്‍ യൂണിറ്റും കോഫി ക്വാളിറ്റി നിര്‍ണ്ണയ ലാബും പ്രവര്‍ത്തിക്കുന്നു.കുടുംബശ്രീയുമായി ചേര്‍ന്നാണ് വിപണന സാധ്യതകള്‍ ഉറപ്പുവരുത്തുന്നത്. ഇതിനായി ബ്രഹ്മഗിരി കാപ്പി കര്‍ഷക ഫെഡറേഷന്റേയും ബ്രഹ്മഗിരി ഫാര്‍മേഴ്‌സ് സൊസൈറ്റിയുടേയും നേതൃത്വത്തില്‍ പഞ്ചായത്തുകളില്‍ സംഘാടക സമിതികള്‍ രൂപീകരിച്ചിട്ടുണ്ട്. പി കെ സുരേഷ് സി എം അനില്‍കുമാര്‍ കെ മോഹന്‍ദാസ്, കെ. ആര്‍ ജുബിനു, യു വേണുഗോപാല്‍ എന്നിവര്‍ വാര്‍ത്തസമ്മേളനത്തില്‍ പങ്കെടുത്തു.
