മാനന്തവാടിയിലെ വിവിധ പൊതുമരാമത്ത് പ്രവൃത്തികള്‍ക്കായി 13.5 കോടി രൂപയുടെ ഭരണാനുമതി. ബജറ്റില്‍ അനുവദിച്ച വിവിധ റോഡ് നവീകരണ പ്രവൃത്തികള്‍ക്കും മാനന്തവാടി കെഎസ്ആര്‍ടിസി ഡിപ്പോ യാര്‍ഡ് നിര്‍മാണത്തിനുമാണ് തുക അനുവദിച്ച് ഭരണാനുമതിയായത്.
വള്ളിയൂര്‍ക്കാവ് പാലം- കമ്മന-കുരിശിങ്കല്‍ റോഡ് ടാറിങ്ങിന് രണ്ട് കോടി, മാനന്തവാടി കെഎസ്ആര്‍ടിസി ഡിപ്പോ യാര്‍ഡ് കോണ്‍ക്രീറ്റ് പ്രവൃത്തിക്ക് രണ്ട് കോടി, തരുവണ- പാലിയാണ-കക്കടവ് റോഡ് ടാറിങ്ങിന് മൂന്ന് കോടി, കണ്ണോത്ത്മല-ഇടമന-വരയാല്‍ റോഡ് ടാറിങ്ങിന് മൂന്ന് കോടി, വെണ്മണി-തിടങ്ങഴി റോഡ് ടാറിങ്ങിന് 1.5 കോടി, അഞ്ചാംപീടിക- പുതുശ്ശേരി- കാഞ്ഞിരങ്ങാട് റോഡ് ടാറിങ്ങിന് രണ്ടു കോടി രൂപ എന്നിങ്ങനെയാണ് അനുവദിച്ചത്. പദ്ധതികള്‍ വേഗത്തില്‍ നടപ്പാക്കാന്‍ പട്ടികജാതി പട്ടികവര്‍ഗ പിന്നാക്കക്ഷേമ വകുപ്പ് മന്ത്രി ഒ ആര്‍ കേളു പൊതുമരാമത്ത് വകുപ്പിന് നിര്‍ദ്ദേശം നല്‍കി. പ്രവൃത്തികള്‍ യാഥാര്‍ത്ഥ്യമാകുന്നതോടെ മാനന്തവാടിയുടെ വികസന മുന്നേറ്റത്തിന് മാറ്റുകൂടുമെന്നും മന്ത്രി പറഞ്ഞു.
