കാറില് കടത്തുകയായിരുന്ന ചന്ദനം വാഹന പരിശോധനക്കിടെ പൊലിസ് പിടികൂടി. സംഭവത്തില് മൂന്ന് പേരെ സുല്ത്താന് ബത്തേരി പൊലിസ് അറസ്റ്റ് ചെയ്തു. കൊടുവളളി സ്വദേശികളായ മൂത്തന് വീട്ടില് ജാഫര് (27), ചാലിയില് അബ്ദുള് അസീസ് (38), ഇവര്ക്ക് ചന്ദനം കൈമാറിയ കല്ലൂര് ഇരിപ്പതൊടിയില് ഗോപി (69) എന്നിവരാണ് അറസ്റ്റിലായത്. മൂലങ്കാവില് ശനിയാഴ്ച വൈകിട്ട് 5 മണിയോടെ നടത്തിയ വാഹന പരിശോധനക്കിടെയാണ് കല്ലൂര് ഭാഗത്ത് നിന്നും എത്തിയ കാറില് നിന്നും 23 കിലോ ചന്ദനം പിടികൂടി. കഷ്ണങ്ങളാക്കിയ ചന്ദനം ചാക്കിലാക്കി കാറിന്റെ ഡിക്കിയിലാണ് സൂക്ഷിച്ചിരുന്നത്. ചന്ദനവുമായി പിടിയിലായ ജാഫര് , അബ്ദുള് അസീസ് എന്നിവരെ ചോദ്യം ചെയ്തതില് നിന്നുമാണ് ചന്ദനം കല്ലൂര് സ്വദേശി ഗോപിയില് നിന്നും വാങ്ങിയതാണന്ന് പൊലിസിന് വിവരം ലഭിച്ചത്. തുടര്ന്ന് പൊലിസ് ഇരുവരുമായി കല്ലൂരില് ഗോപിയുടെ വീട്ടിലെത്തി ഇയാളെയും പിടികൂടുകയായിരുന്നു. ചന്ദനം വില്പ്പന നടത്തിയതില് ലഭിച്ച 40000 രൂപയും , ചന്ദനം മുറിച്ച് കഷ്ണങ്ങളാക്കാന് ഉപയോഗിച്ച വാളും പൊലിസ് കണ്ടെടുത്തു. സ്വകാര്യ വ്യക്തിയുടെ ഭൂമിയില് നിന്നും വാങ്ങിയ ചന്ദനമാണന്നാണ് ചോദ്യം ചെയ്യലില് ഗോപി പൊലിസിനോട് പറഞ്ഞതെന്നാണ് വിവരം. സബ് ഇന്സ്പെക്ടര് ജെ ഷജീമിന്റെ നേതൃത്വത്തിലാണ് ചന്ദനം പിടികൂടിയത്.
