ആര്‍ത്തവ ശുചിത്വ രംഗത്ത് വലിയ മുന്നേറ്റം സൃഷ്ടിക്കുന്ന കപ്പ് ഓഫ് ഹോപ്പ് പദ്ധതിയ്ക്ക് മീനങ്ങാടിയില്‍ തുടക്കമായി. ഗ്രാമ പഞ്ചായത്ത് സാമൂഹ്യാരോഗ്യ കേന്ദ്രത്തിന്റെയും ഹിന്ദുസ്ഥാന്‍ ലാറ്റക്‌സ് ലിമിറ്റഡിന്റെയും സഹകരണത്തോടെയാണ് പദ്ധതി നടപ്പിലാക്കുന്നത്. പതിനാറ് ലക്ഷം രൂപയാണ് പദ്ധതിയ്ക്കായി വകയിരുത്തിയത്.ആര്‍ത്തവ സമയത്ത് സ്ത്രീകള്‍ അനുഭവിക്കുന്ന ശാരീരികവും മാനസികവുമായ വെല്ലുവിളികളെ അഭിസംബോധന ചെയ്യുകയും തുറന്ന ചര്‍ച്ചയ്ക്ക് വേദിയൊരുക്കുകയുമാണ് കപ്പ് ഓഫ് ഹോപ്പ്.ഒറ്റത്തവണ ഉപയോഗിക്കുന്ന സാനിറ്ററി പാഡുകള്‍ ഉണ്ടാക്കുന്ന ആരോഗ്യപരമായ പ്രത്യാഘാതങ്ങള്‍ ഗൗരവതരമാണ്. നിലവില്‍ ഇത്തരം പാഡുകള്‍ നിര്‍മ്മാര്‍ജ്ജനം ചെയ്യാന്‍ പരിസ്ഥിതി സൗഹൃദമായ രീതികളൊന്നും തന്നെ കണ്ടെത്തിയിട്ടില്ല. ബഹുഭൂരിപക്ഷം ആളുകളും ഉപയോഗശേഷം പാഡുകള്‍ കത്തിക്കുകയോ കുഴിച്ചിടുകയോ ചെയ്യുകയാണ് പതിവ്. ഈ രണ്ട് രീതികളും പാരിസ്ഥിതികമായുണ്ടാക്കുന്ന പ്രശ്‌നങ്ങള്‍ ഏറെ ദോഷം ചെയ്യുന്നവയാണ്. മെന്‍സ്ട്രല്‍ കപ്പ് ഉപയോഗിക്കുന്നതിലൂടെ മേല്‍പ്പറഞ്ഞ പ്രശ്‌നങ്ങളെ പൂര്‍ണ്ണമായും ഒഴിവാക്കാന്‍ സാധിക്കുമെന്നതാണ് പദ്ധതിയിലൂടെ ലക്ഷ്യമിടുന്നത്. ഒരു സ്ത്രീ പ്രതിവര്‍ഷം 130 മുതല്‍ 260 വരെ സാനിറ്ററി നാപ്കിന്‍ ഉപയോഗിക്കുന്നുണ്ടെന്നാണ് ഇതുമായി ബന്ധപ്പെട്ട് പഠനം നടത്തിയവര്‍ പറയുന്നത്. മെന്‍സ്ട്രല്‍ കപ്പ് ഉപയോഗിക്കുന്ന ഒരു വനിത ശരാശരി 3.9 കിലോ ഗ്രാം സാനിറ്ററി പാഡ് മാലിന്യം ഒഴിവാക്കുന്നു എന്നാണ് കണക്കുകള്‍. ഈ മാലിന്യം കത്തിക്കുന്നതിലൂടെ വിഷവാതകങ്ങള്‍ അന്തരീക്ഷത്തിലേക്ക് പുറന്തള്ളപ്പെടുന്നതിനോടൊപ്പം കാലാവസ്ഥ വ്യതിയാനത്തിന് കാരണമായ കാര്‍ബണ്‍ ബഹിര്‍ഗമനത്തിനും കാരണമാകും. കാര്‍ബണ്‍ ന്യൂട്രല്‍ പഞ്ചായത്ത് എന്ന നിലയില്‍ അയ്യായിരം മെന്‍സ്ട്രല്‍ കപ്പുകള്‍ വിതരണം ചെയ്യുന്നതിലൂടെ പ്രതിവര്‍ഷം പത്തൊമ്പത് ടണ്‍ തത്തുല്യ കാര്‍ബണ്‍ ഡൈ ഓക്‌സൈഡ് ബഹിര്‍ഗമനം കുറയ്ക്കാന്‍ പഞ്ചായത്തിന് സാധിക്കും.
ആശാ വര്‍ക്കര്‍, അങ്കണവാടി ടീച്ചര്‍, ഹെല്‍പ്പര്‍, ഹെല്‍ത്ത് വളണ്ടീയര്‍മാര്‍ എന്നിവരിലൂടെ നൂറിലധികം വരുന്ന അംഗങ്ങള്‍ക്ക് പരിശീലനം നല്‍കിയാണ് പദ്ധതി നടപ്പിലാക്കുന്നത്. സ്ത്രീ സൗഹൃദവും സുസ്ഥിരവും പരിസ്ഥിതി സൗഹൃദവുമായ മെന്‍സ്ട്രല്‍ കപ്പിനെ കുറിച്ച് വ്യാപകമായ ബോധവര്‍ക്കരണം നടത്തി അയ്യായിരം മെന്‍സ്ട്രല്‍ കപ്പുകളാണ് ആദ്യ ഘട്ടത്തില്‍ പഞ്ചായത്തില്‍ വിതരണം ചെയ്യുന്നത്. വരുംവര്‍ഷത്തോടെ എല്ലാ വനിതകള്‍ക്കും മെന്‍സ്ട്രല്‍ കപ്പ് ലഭ്യമാക്കുന്ന വിധമാണ് പദ്ധതി ആവിഷ്‌കരിക്കുന്നത്.ജില്ലാ പഞ്ചായത്ത് പ്രസിഡന്റ് സംഷാദ് മരയ്ക്കാര്‍ പദ്ധതിയുടെ ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്റ് കെ.ഇ. വിനയന്‍ ടൗണ്‍ പ്ലാനര്‍ ഡോ. ആതിര രവി, എച്ച്.എല്‍.എല്‍ കണ്‍സള്‍ട്ടന്റ് ഡോ. ഘന എന്നിവര്‍ ഹെല്‍ത്ത് ഇന്‍സ്‌പെക്ടര്‍ ഗീത തുടങ്ങിയവര്‍ സംസാരിച്ചു.
