എം.എല്‍.എ ഐ.സി.ബാലകൃഷ്ണന്റെ നേതൃത്വത്തില്‍ യു.ഡി.എഫ് നേതാക്കളും പ്രവര്‍ത്തകരും ഡി.എഫ്.ഒ ഓഫീസിനു മുന്നില്‍ കുത്തിയിരിപ്പ് സമരം നടത്തുന്നു.വടക്കനാട് ചേര്‍ന്ന ഉന്നതതല യോഗത്തില്‍ സ്ഥിരം ശല്യക്കാരനായ ആനയെ പിടികൂടി മാറ്റാമെന്ന ഉറപ്പ് വനം വകുപ്പ് പാലിക്കാത്തതില്‍ പ്രതിഷേധിച്ചാണ് എം.എല്‍.എയുടെ നേതൃത്വത്തില്‍ കുത്തിയിരിപ്പ് സമരം.പ്രശ്‌ന പരിഹാരമാവാതെ സമരം അവസാനിപ്പിക്കല്ലന്ന നിലപാടിലാണ് എം.എല്‍.എ. രാവിലെ പത്തരയോടെയാണ് എം എല്‍.എയും യു.ഡി.എഫ് നേതാക്കളും ബത്തേരിയിലെ ഡി.എഫ്.ഒ ഓഫീസിലെത്തിയത്.തുടര്‍ന്ന് ഡി.എഫ്.ഒയുമയി നടത്തിയ ചര്‍ച്ചയിലും ആനയെ പിടികൂടുന്നതുമായി ബന്ധപ്പെട്ട് ഉറപ്പ് ഡി.എഫ്.ഒ നല്‍കാത്ത സാഹചര്യത്തിലാണ് എം.എല്‍.എ ഓഫീസിനു മുന്നില്‍ കുത്തിയിരിപ്പ് സമരം ആരംഭിച്ചത്.ഈ മാസം ഏഴിന് വടക്ക നാട് ചേര്‍ന്ന യോഗത്തിലെടുത്ത തീരുമാനം വനം വകുപ്പ് നടപ്പിലാക്കിയില്ലന്നും ആനയെ പ്രദേശത്തു നിന്നു മാറ്റാതെ സമരം അവസാനിപ്പിക്കില്ലന്നും എം.എല്‍.എ പറഞ്ഞു. കുത്തിയിരിപ്പ് സമരത്തില്‍ നേതാക്കളായ കെ.എല്‍.പൗലോസ്, കെ.കെ.അബ്രഹാം, ടി.മുഹമ്മദ് തുടങിയവര്‍ പങ്കെടുക്കുന്നുണ്ട്. അതേ സമയം ആനയെ പ്രദേശത്ത് നിന്നും പിടികൂടി മാറ്റാനുള്ള നടപടികള്‍ക്കായി വനം വകുപ്പ് സര്‍ക്കാറിനെ അറിയിച്ചതായാണ് അറിയുന്നത്.
